नालासोपारा, 27 जून 2025: नालासोपारा पश्चिमेतील समेळ गावात गुरुवारी दुपारी भीषण अपघातात एका तरुणाचा जागीच मृत्यू झाला. श्रवण घरटकर (रा. निळेमोरे, नालासोपारा पश्चिम) हा तरुण मित्रांसह समुद्रकिनारी जात असताना, दुपारी सुमारे १२ वाजता तो अ‍ॅक्टिवा दुचाकीवरून समेळ येथील सोपारा इंग्लिश स्कूलसमोर पोहोचला असता, वसई-विरार महापालिकेच्या कचरा उचलणाऱ्या भरधाव गाडीने त्याला धडक दिली.
धडक एवढी जोरात होती की श्रवण गाडीच्या चाकाखाली आला आणि त्याचा घटनास्थळीच मृत्यू झाला. अपघातानंतर कचरागाडीचा चालक वाहन सोडून फरार झाला. सदर गाडी महापालिकेच्या ठेकेदाराची असल्याचे निष्पन्न झाले असून, गाडीत कोणतेही अधिकृत कागदपत्र सापडले नाहीत.
🗣️ नागरिक संतप्त – मनुष्यवधाचा गुन्हा दाखल करण्याची मागणी
स्थानिक नागरिकांनी सांगितले की, महापालिकेच्या कचरागाड्या नेहमीच वेगात धावत असतात आणि गतीरोधकाकडे दुर्लक्ष केल्याने अपघाताची शक्यता होतीच. ही भीती अखेर खरी ठरली. त्यामुळे नागरिकांनी सखोल चौकशी करून संबंधित ठेकेदार आणि महापालिका अधिकाऱ्यांविरोधात मनुष्यवधाचा गुन्हा दाखल करण्याची मागणी केली आहे.
